കുരിശിലൊരിടം

കുരിശിലൊരിടം

അലഞ്ഞുഞാൻ നിന്നെ തേടി ലോകമെല്ലാം,
കണ്ടുഞാൻ നിന്നെ മണ്ണിനും വിണ്ണിനും മദ്ധ്യേ,
സർവ്വം മറന്നു ഓടി ഞാൻ നേടിയതെല്ലാംവ്യർത്ഥമായ് നിൻ കരിശിലിടം നേടിയപ്പോൾ.

വരൂ എന്നരികെ എന്നവൻ ചൊല്ലി ഞാൻ കുഞ്ഞായിരുന്നപ്പോൾ...
വരൂ എൻ പിന്നാലെ എന്നവൻ പറഞ്ഞു ഞാൻ വളർന്നപ്പോൾ
വരൂ എൻ കുരിശു വഹിക്കൂ എന്നവനോതി ഞാൻ ശിഷ്യയായപ്പോൾ
തരൂ നിൻ കുരിശിലൊരിടം എന്നു ഞാൻ കെഞ്ചി നാഥനെ ഞാനറിഞ്ഞപ്പോൾ.

വ്യർത്ഥ സ്വപ്നങ്ങളേ വിട
വിരഹ ദു:ഖങ്ങളേ വിട
വീടിനും, വീട്ടാർക്കും, കൂട്ടുകാർക്കും വിട
വിജയത്തിനും വീറിനും വെറുപ്പിനും വിട...

നിന്റെ നെടുവീർപ്പുകൾ കേട്ടു നിശബ്ദയായ് കരയാൻ,
നിന്റെ ആണികളുടെ മുനകളാൽ എൻ കൈകാലുകൾ തുളക്കുവാൻ,
നിന്റെ ചെഞ്ചോരയാൽ എൻ ഘോര പാപങ്ങൾ കഴുകാൻ,
നിന്റെ സാമീപ്യത്താൽ, തിരുമൊഴിയാൽ പറുദീസ നേടാൽ
നിന്റെ സ്നേഹത്തിൻ നിഴലാകാൻ,
നിന്റെ ത്യാഗത്തിൻ സാക്ഷിയാകാൻ,
നിന്റെ മുറിവുകളാൽ മുദ്രിതയാകാൻ
നിൻ കുരിശിലൊരിടമേകണേ നാഥാ...

സോണിയ കെ ചാക്കോ , ഡിസി