Journey to the Crib

                                                 *പുൽക്കൂട്ടിലേക്ക് *

ആർട്ടിഫിഷ്യൽ ഇൻറലിജൻസിന്റെയും, സൂപ്പർസോണിക് വിമാനങ്ങളുടെയും ഒരു കൈ വിരൽ സ്പർശത്തിലൂടെ ലോകത്തിൻറെ ഏതു കോണിലും ഒരു നിമിഷം കൊണ്ട് എത്തിച്ചേരാവുന്ന ഈ നൂറ്റാണ്ടിൽ ഈ ക്രിസ്തുമസ് വേളയിൽ നമുക്കും നടക്കാം പുൽക്കൂട്ടിലേക്ക്...!

AC വാഹനങ്ങളും മണിമാളികകളും നിറഞ്ഞുനിൽക്കുന്ന നിരത്തിൽ നിന്നും അധികം ആരും സഞ്ചരിക്കാത്ത നിരത്തിലേക്ക് മനസ്സിൻറെ നിശബ്ദതയിൽ ചലിച്ചു തുടങ്ങാം ഈ യാത്ര ദീർഘം ആണോ, ഹ്രസ്വമാണോ, ചിലവുള്ളതാണോ, ചിലവ് കുറഞ്ഞ താണോ, മനോഹരമാണോ,  ആത്മീയമാണോ, എന്ന് നമുക്ക് തന്നെ തീരുമാനിക്കാം. ചിലപ്പോൾ ജ്ഞാനികളെ പോലെ ഒരു ദീർഘ യാത്രയാവാം, ചിലപ്പോൾ ആട്ടിടയരെപോലെ ഒരു ലളിത യാത്രയാകാം, ചിലർക്ക് അത് ഹേറോദോസിന്റെ അരമനയിലുള്ളവരെ പോലെ യേശുവിനെക്കുറിച്ചുള്ള കേട്ടറിവു മാത്രമാകാം.

 അറിവിൽ നിന്ന് അനുഭവത്തിലേക്ക് മൃദുലത നിറഞ്ഞ നല്ല മനുഷ്യരായി നീങ്ങാം നമുക്ക് പുൽക്കൂട്ടിലേക്ക്.

         ലോകത്തിൻറെ നാഥനും ഹൃദയത്തിൻറെ രാജനുമായ സർവ്വേശ്വരൻ ഈ ക്രിസ്തുമസ് ദിനം ജനിക്കുന്നത് ഏത് പുൽക്കൂട്ടിൽ ആകും.?

പഴനിയിൽ എവിടെയോ ജനിച്ച്, മലബാറിലെ ഇരിട്ടിയിൽ ഭിക്ഷ യാചിച്ചിരുന്ന ഒരു അമ്മാൾ അപസ്മാരത്താൽ ബോധമറ്റു കിടക്കുന്നത് കണ്ട് ചില സംഘടനാ ഭാരവാഹികൾ മാരിലാക് ഭവനത്തിൽ എത്തിച്ചു. ആദ്യമേ തന്നെ രണ്ടുമൂന്നു പ്രാവശ്യം ഞങ്ങൾ കുളിപ്പിച്ച്, തലമുടി , ഭക്ഷണം കൊടുത്തു കൊണ്ടിരുന്നപ്പോൾ അമ്മ ചോദിച്ചു  “അമ്മാ, നീങ്കൾ കടവുളാ..?

 പുല്ലുവഴിയിലെ വാഴ്ത്തപ്പെട്ട റാണി മരിയയുടെ വീട്ടിലെത്തിയ മകളുടെ ഘാതകനെ ഊഷ്മള സ്നേഹത്തോടെ സ്വീകരിച്ചപ്പോൾ പൊട്ടിക്കരഞ്ഞ സമന്തർ സിംഗ് മനസ്സിൽ പറഞ്ഞു  “ഇവർ ദൈവമാണ്..!"

           ബെത്‌ലഹേം നമ്മുടെ മുന്നിൽ തെളിഞ്ഞു നിൽക്കുന്ന നഗരമാണ്. പാരിന്റെ നാഥൻ പിറന്ന പുൽക്കൂടും നമ്മുടെ നയനങ്ങൾക്ക് മുന്നിലാണ്. പുൽക്കൂട്ടിൽ പിറന്ന ഉണ്ണി മിശിഹാ കൺമുന്നിൽ കടന്നുവരുന്ന ഓരോ വ്യക്തിയും ആണ്. അറിയാതെ മനസ്സിൽ മെനഞ്ഞു വെച്ച അന്ധതയുടെ അതിർവരമ്പുകൾ പൊട്ടിച്ചെറിയുമ്പോൾ പുൽക്കൂട്ടിലെ ഉണ്ണിയുടെ നിഷ്കളങ്കമായ പുഞ്ചിരി അവിടെ നമ്മൾ കാണും. ജ്ഞാനികൾ കണ്ട താരം മനസ്സിൽ സന്തോഷത്താൽ ഉദിക്കും. പിന്നെ നമ്മൾ യാത്രികരല്ല താരകങ്ങൾ ആയിരിക്കും. മറ്റുള്ളവരെ പുൽക്കൂട്ടിൽ എത്തിക്കുന്ന ദിവ്യ താരങ്ങൾ. അതാവണം നമ്മുടെ നിയോഗം... യാത്ര തുടരുന്നു..!

....✒️ *സി  സോണിയ കെ ചാക്കോ,ഡിസി*

(Daughters of Charity of St Vincent de Paul)

🧚‍♀️🧚‍♀️🎼🎺🎼🎷🎹🎺🥁🧚‍♂️🧚‍♂️

*"അത്യുന്നതങ്ങളിൽ ദൈവത്തിനു സ്തുതി, ഭൂമിയിൽ സന്മനസുള്ളവർക്ക് സമാധാനം"*

🎊🎉🎈🎁🎀🎼🥁🎺🎷🎊🎉